Вардар 1961 победнички стартуваше во СЕХА лигата

Македонскиот ракометен првак Вардар 1961 со победа ја започна новата сезона во регионалната СЕХА лига, откако вечерва славеше во Скопје над актуелниот лидер во српското првенство Војводина со 25:21 (15:10)

Вардар веќе во воведните десет минути на мечот во салата „Јане Сандански“ стигна до сигурна предност од пет голови разлика (6:1) што ја одржа до полувремето (15:10).

Продолжението не донесе резултатска неизвесност и ракометарите на Вардар рутински го приведоа мечот во сигурна завршница за први бодови во СЕХА лигата, во рамки на третото коло.

Најефикасни во редовите на Вардар беа Гоце Георгиевски и Тимур Дибиров со по четири голови, додека Борко Ристовски имаше десет обрани на голот.

Македонскиот првак својот втор натпревар во Б-групата ќе го игра на 1 февруари, повторно на домашен терен, против хрватскиот претставник Нексе.