Вакцината „Модерна“ ќе чини до 37 долари по доза

Фармацевтската компанија Модерна објави дека дозата на вакцината што ја развива против КОВИД-19 ќе чини помеѓу 25 и 37 американски долари, во зависност од нарачаната количина, објави БНР.

Извршниот директор на компанијата, Стефан Бансел, за германскиот весник „Велт ам Зонтаг“ изјави дека цената е слична на стандардната вакцина за грип, која чини меѓу 10 и 50 долари.

Претставник од Брисел во понеделникот изјави дека Европската комисија има за цел да постигне договор со компанијата за снабдување на милиони дози во вредност помала од 25 долари за една.

Бансел, исто така, истакна дека сè уште не е потпишан договор и се водат преговори, но истакна дека е „прашање на денови пред да биде подготвен договорот“.