Триесет и втори „Мариовско -мегленски културни средби“

Во Мариово денеска ќе се одржат 32-те Мариовско-мегленските културни средби. Како што соопштија  организаторите, здружението „Мариовско-мегленски културни средби“ и локалната самоуправа на Прилеп, средбите ќе се одржат во манастирот Свети Илија, во близина на селото Витолиште.

 

- Со овие средби се негува фолклорното и културно наследство на регионите. Присуствуваат жители од Прилеп и цела Македонија, локалното население и бројни учесници во културно-уметничката програма. Целта и значењето на манифестацијата е зближувањето на жителите од двата региона, Мариово и Меглен, средба на оние кои се иселиле, а засекогаш ќе бидат врзани за родниот крај, како и културна размена во пошироки рамки, изјави Снежана Ристеска, советник за култура во прилепската локална самоуправа.

 

Средбите ќе бидат отворени од 10 часот на манастирот „Свети Илија“, а во културно-уметничката програма ќе настапат: КУД „Мирче Ацев“ со играорна група од Крушево, Фолклорниот ансамбл „Тиквеш“ од Кавадарци и ансамблот на Стевче Стојкоски од Скопје. Свои творби ќе читаат и членови од Друштвото на писателите на Македонија.

 

Според градоначалникот Марјан Ристески овие средби се потврда на културното зближување на регионите.

 

- Оваа долго-традиционална манифестација е промоција на традициите и културата од овој крај и потсетување на еколошки најчистиот регион во земјава- Мариово, вели Ристески.

Како што е најавено, ќе се одржи и велосипедски наптревар, како и поставување камп во село Манастир, по што ќе се отвори и Outdoor Festival со проекција на кратки филмови, изложба на фотографии и музичка програма. Средбата ќе заврши со традиционален заеднички ручек во манастирот „Св.Илија“.

Значајно за овие средби е нивниот придонес кон развојот на руралниот туризам и промовирањето на Мариовскиот регион.