Супер потег, ако натпреварот е здодевен шутирајте пенали?!

Суперкупот на Мавританија бил прекинат во 63. минута, бидејќи  на претседателот на државата Мохамед Оулд Абдел Азиз му било здодевно. Првиот човек на оваа држава, како што пренесува италијанска Gazzetta, побарал веднаш да се пристапи кон изведувањето на пенали.

 

Во финалето на Суперкупот на Мавританија противници биле Теварг Зеина и Ксар, а до 63.минута резултатот бил 1:1. Претседтелот на оваа африканска држава Мохамед Оулд Абдел Азиз го следел мечот, кој не го привлекол неговиот интерес, па поради тоа преку своите луѓе испратил порака до главниот судија да го прекине мечот и победникот да биде решен по изведувањето на пенали.

 

Главниот судија ја извршил наредбата, на играчите им објаснил дека треба да се однесуваат онака како што бара шефот на државата.

 

По изведувањето на пенали трофејот го освоил тимот на Теварг Зеина.

 

Инаку, од Фудбалскиот сојуз на Мавританија со соопштение демантирале дека мечот бил прекинат по интервенцијата на претседателот на државата.

 

„Најостро ги демантираме наводите дека имало било каква интервенција од шефот на државата мечот да биде прекинат. Одлуката беше донесена во договор со организаторот на натпреварот, претседателите на двата клуба и капитените на екипите“, стои во кусото соопштение на првиот човек на Фудбалскиот сојуз на Мавританија, Ахменд Абдерахман.