Штрахе сака барателите на азил да ги смести во касарни

Австрискиот вицеканцелар Хајнц-Кристијан Штрахе во интервју за австриската државна телевизија ОРФ изјави дека во иднина барателите на азил треба да бидат сместени во касарни и оти треба да се размисли за некој вид забрана за излегување на бегалците.

- Треба да се размисли која од седумте касарни во Виена не е доволно искористена, посочи Штрахе.

Тој додаде дека целта е грижата за барателите на азил повторно да ја преземе државата.

- Актуелниот проблем е во тоа што многу е преземено од невладините организации и приватните здруженија. Сакаме да го запреме правењето бизнис на тој начин, истакна Штрахе.

Во моментот во Виена има околу 13.000 баратели на азил кои се во приватни прифатилишта, а Штрахе најави и евентуално воведување на забрана за барателите на азил.

- Во минатото веќе се разговараше за тоа, во одредени вечерни часови барателите на азил да мора да се вратат во објектите каде се сместени, истакна Штрахе.