Штип во функција стави два пункта за дезинфекција на возилата

Во Штип денеска се ставени во функција два од три пункта за дезинфекција на возилата кои влегуваат во општината. Едниот е  кај влезот од Скопје кон Штип кај Републичката полиција, другиот на влезот од Струмица и Радовиш кон Штип кај училиштето „Искра“, информира градоначалникот на Штип, Благој Бочварски.

Тој истакна дека дополнително од утре ќе се работи на пункт кај влезот од Кочани кон Штип, поточно кај индустриската зона „Македонка“.

-Општина Штип ги презема сите мерки и чекори коишто се во насока на поголема заштита на граѓаните, на сите возила коишто влегуваат и доаѓаат од околните градови. Морам да напоменам дека останатиот дел од градот, постојано се дезинфицира преку ТППЕ и ЈП „Исар“. Дезинфицирани се улиците, плоштадите, јавно прометните површини и влезовите од станбените згради, вели Бочварски.

Тој посочи дека полицијата ќе ги контролира сите пунктови каде што возилата кои влегуваат во градот мора да поминат и ќе се изрекува казна доколку одредено возило го заобиколува овој пункт за дезинфекција.

Општина Штип искажува благодарност на три градежни компании коишто излегоа во пресрет на Општината и брзо и ефикасно ги изградија овие пунктови, а тоа се Коле Транс Инженеринг, БАУ Инженеринг и Пелагонија инженеринг.