САД воведе санкции за уште десетмина претставници на Венецуела

Американското Министерство за финансии воведе санкции за уште десетмина претставници на Венецуела, меѓу кои и неколкумина министри од Владата за кои тврди дека му помагале на венецуелскиот претседател, Николас Мадуро во обидот да ја поткопа демократијата во земјата.

- Овие лица се поврзани со поткопувањето на изборниот процес, цензурата на медиумите или корупцијата во владините програми за храна во Венецуела, се наведува во соопштението на американското Министерство.

Меѓу претставниците за кои се воведени санкции се и венецуелскиот амбасадор во Италија, Хулијан Родригез Дијаз, министерот за култура, Ернесто Ермилио Вилијегас Полјак и министерот за земјоделство Фреди Бернар Розалез.

Како што јави МИА, САД претходно воведоа санкции за десетина актуелни и поранешни венецуелски претставници откако Владата на Венецуела во август оформи Уставотворно собрание на кое му се доделени практично неограничени овластувања.