САД се повлекуваат од УНЕСКО

САД го известија официјално УНЕСКО дека се повлекуваат од таа организација на ОН. Тоа го изјави денеска генералниот директор на УНЕСКО, Ирина Бокова.

Според западни медиуми, САД ќе го напуштат УНЕСКО од 31 декември.

Според дипломатски извори, со тој потег САД ќе ја отежнат уште повеќе ситуацијата на организацијата на ОН за култура и образование, на која и прават проблем регионалните ривалства и недостатокот на финансирање.

САД го откажаа својот значителен финансиски придонес во буџетот на УНЕСКО во 2011 година, како протест поради одлуката за обезбедување полноправно членство на Палестинците.

Според списанието Форин полиси, САД сакаат да заштедат пари и да протестираат поради антиизраелската позиција на УНЕСКО.

САД обезбедуваа 80 милиони долари годишно на УНЕСКО, што е речиси една петтина од буџетот на организацијата.