Рускиот регулатор ги казни ТикТок, Телеграм, Зум, Дискорд и Пинтерест

Руската агенција за регулирање на медиумите Роскомнадзор денеска соопшти дека ќе казни неколку ИТ компании, вклучувајќи ги ТикТок, Телеграм, Зум, Дискорд и Пинтерест.

Во соопштението на Роскомнадзор се наведува дека мерките се преземени откако овие компании не ја отстраниле содржината што била означена како нелегална и дека казните ќе останат во сила сè додека не се отстрани спорната содржина.

Не е прецизирано за кои мерки станува збор.

Русија постојано се закануваше дека ќе ги казни социјалните мрежи и пребарувачите како Гугл за кршење на строгите закони кои го криминализираат ширењето на „лажни вести“ за руската војска.

Руските судови на 16 август го казнија американскиот сервис за стриминг Твич со два милиона рубљи (околу 33.859 евра) и апликацијата за пораки Телеграм со 11 милиони рубљи (186.226 евра) поради кршење на законот за воена цензура.