Путин и Камерон разговараа за истрагата за падот на рускиот авион

Рускиот претседател Владимир Путин и британскиот премиер Дејвид Камерон денеска телефонски разговараа за истрагата за падот на рускиот патнички авион во Египет, соопшти денеска прес-службата на Кремљ, пренесува Танјуг.

Во разговорот инициран од британска страна, Путин потенцирал колку е важно проценката на можните причини за падот на леталото да биде заснована на информации од официјалната истрага, се наведува во соопштението.

- Тие исто така, ја разгледуваа и можноста за заедничка борба против тероризмот, се наведува во соопштението, кое го пренесува ТАСС.

Камерон претходно денеска изјави дека е „повеќе веројатно отколку што не е“ дека падот на рускиот патнички авион е предизвикан од бомба. Британските функционери се уште не се сигурни дека авионот е разнесен од бомба, но за тоа постои „голема можност“, рече Камерон пред својата резиденција во даунинг Стрит 10.

Авионот „Ербас А321“, на руската авиокомпанија „Когалимавија“ на летот од Шарм ел шеик до Санк Петерсбург се урна во саботата 23 минути по полетувањето, при што загинаа сите 224 патници и членови на екипажот.