Протестен марш на кочанските пензионери за линеарно покачување на пензиите

Пензионерите од кочанскиот Иницијативен одбор велат дека се револтирани од изјавите на надлежни за нивните пензии. Тие денеска повторно излегоа на протестен марш и побараа да се одвојат пари за повисоки пензии.

На протестниот собир потсетија на барањата за линеарно покачување од 3.500 денари на сите пензионери и минимална пензија од 18.000 до 20.000 денари, а потоа се упатија на протестен марш до Фондот за пензионерско и инвалидско осигурување. Според пораката што ја упатија, ќе продолжат со протестите за достоинствен живот.

- Масовното присуство на овој протест за правда и право на достоинствен живот е потврда дека сме доведени до дно на егзистенцијата, дека немаме друг избор освен да се бориме да го добиеме тоа што ни припаѓа, предолго чекавме и предолго молчевме, изјавија пензионерите.

Ова е втор протестен марш на Иницијативниот одбор на пензионери од Кочани, за кој потсетија дека не е политички мотивиран. Според најавите, пензионери од цела држава ќе го одржат вториот генерален протест на 20 септември кога се одбележува Денот на пензионерите.