Продажбата во маркетите во северна Италија се зголеми за 73 проценти

Продажбата во големите трговски синџири во северна Италија во неделата се зголеми за 73 проценти во споредба со истиот датум минатата година, бидејќи граѓаните почнаа да купуваат резерви на основни намирници, по информациите за ширењето на новиот коронавирус во земјата, соопшти денеска институтот Нилсен.

Италијанските власти во неделата ги изолираа најтешко погодените области во Ломбардија и Венето во северниот дел на земјата и ги откажаа спортските настани, а ги затворија и училиштата и универзитетите.

Во Ломбардија, продажбата во големите трговски синџири во неделата се зголеми за 87 проценти, соопшти институтот Нилсен.

Покрај храната од рафтовите, вклучително и ориз, тестенини и сосови за тестенини, најбарани биле производите за лична нега и парафармацевтските производи.

– Според нашите податоци, може да се заклучи дека постои загриженост поради можен карантин, рече директорот на Нилсен, Ромоло де Камилис.