ОН почнува со операција од воздух за доставување храна и лекови за сирискиот град Дејр ал Зур

ОН има намера да пушти пратки со храна од воздух во сирискиот град Дејр ал Зур, кој е под опсада на силите на џихадистичката Исламска држава, изјави во Женева претставник на Светската организација.

- Постои „конкретен план“ од ОН за извршување на сложената операција во следните неколку дена, изјави на прес конференција Јан Егеланд по седница на специјална група задолжена за операцијата.

– Голем број членки на ОН ветија учество во акцијата, меѓу нив и Русија и САД, изјави Егеланд.

Во изминатите 24 часа 114 камиони на ОН доставија прехранбени продукти и лекови за 80.000 луѓе во пет опколени региони во Сирија, и ОН бара начини да обезбеди пристап до уште над четири милиони луѓе во тешко достапни зони во Сирија.