Освоија титула а пари за плати нема

Свежи по освојувањето на првото скудето по 11 години, претседателот на Интер Стивен Жанг побарал од фудбалерите на „нераѕурите“ да помогнат финансиски на клубот со тоа што ќе се откажат од две месечни плати, тврди „Скај спорт Италија“.

 

Спортскиот директор на тимот, Бепе Марота во саботата призна дека финансиската состојба на клубот е „катастрофална“ поради пандемијата на КОВИД-19, како и кај другите големи европски клубови и потврди дека ќе се оди на „совеста“ на играчите, односно тие да ја проценат ситуацијата во која се наоѓаат.

 

Според „Скај спортс“, Жанг денеска наутро се сретнал со фудбалерите на клубот и побарал тие да се откажат од две месечни плати за следната сезона, откако претходно наводно тие се откажале од бонусите за титулата.

 

Сега, според италијанските медиуми, ќе се остави време секој фудбалер индивидуално да направи проценка и потоа да оди на личен состанок со Жанг.