Османи ќе го презентира новиот реформски План 18

Вицепремиерот Бујар Османи денеска пред претставници на граѓанскиот сектор, медиумите, експерти и други заинтересирани страни ќе ги презентира содржината, имплементацијата и значењето на новиот реформски План 18. 

Османи во изминатите два дена го презентираше Планот 18 пред претставници на ЕУ во Брисел. Во интервјуто за МИА вели Владата останува посветена на одржлив и неповратен процес на реформи.

- Соодветниот чекор после 369 ќе беше отворање на поглавјата 23, 24 меѓутоа за да не ризикуваме да има дупка помеѓу планот 369 и отворањето преговори го лансираме Планот 18, кој ги има истите столбови како 369 - судство, администрацијата, безбедносни служби, нагласи вицепремиерот.

Османи посочил дека Македонија останува посветена на реформскиот процес и по добивањето на препораката и позитивниот извештај на Европската Комисија.

- Планот 3-6-9 создаде солидна основа и подготовка за имплементација на суштинските и долгорочните реформи во насока на приближување на нашето општество со европското, при што, Планот 18 претставува логично продолжение на реформската агенда на Владата за системска координација и следење на имплементацијата на овие реформи, сѐ до почетокот на преговорите, нагласил Османи.

Тој ги изразил своите очекувања дека постигнатиот напредок во имплементацијата на реформите, но и во отстранувањето на политичките пречки, ќе биде соодветно валоризиран на претстојните самити на ЕУ на крајов на месецов со што ќе се запечати европската иднината на Македонија, но и евроатлантската ориентација на сите земји од Западен Балкан.