Очекувано Барселона финалист на „кралскиот куп“

Екипата на Барселона ќе игра во финалето на шпанскиот фудбалски куп, откако беше поуспешна во полуфиналната пресметка со Валенсија.

 

Во реваншот синоќа на „Местаља“ резултатот беше нерешен 1:1, па убедливата победа на Каталонците од 7:0 на првиот дуел се покажа како пресудна за вкупниот победник.

 

Алваро Негредо во 39.минута го отвори резултатот обезбедувајќи водство за Валенсија, додека Барселона изедначи преку Вилфрид Каптум на шест минути пред крајот.

 

Тренерот на гостите Луис Енрике на овој меч извади состав главно од фудбалери кои не добиваат минутажа или многу малку играат во првенството.

 

Барселона во финалето ќе игра најверојатно со Севиља која на првиот дуел од полуфиналето ја победи Селта со убедливи 4:0.

 

Реваншот од овој двомеч е вечер во Виго од 20 часот и 30 минути.