Нов севернокорејски успешен тест за лансирање ракета

Северна Кореја изврши успешен тест од копно на ракета за лансирање сателити, со нов тип мотор со голема моќност. Тестирањето го надгледувал и севернокорејскиот лидер Ким Џонг-ун, јавија севернокорејски медиуми.

Ким бил присутен на тестирањето во Вселенскиот центар Сохае на запад во државата, се вели во соопштение и побарал од научниците што е можно побрзо да биде лансиран сателит.

Новиот мотор  обезбедува ракетниот носач да може да лансира разни видови сателити меѓу кои и сателити за надгледување на површината на Земјата.

Лансирањето го побарал Ким, јави севернокорејската агенција КЦНА. Тоа е прво негово појавување во јавност на воен настан откако во Пјонгјанг на 9 септември беше извршена петта нуклеарна проба.

Најновото тестирање е извршено во момент на глобални осуди за петтата нуклеарна проба на Северна Кореја, но и по повикот на САД, Јапонија и Јужна Кореја за поголем притисок врз Пјонгјанг поради непочитување на резолуции на ОН со кои се забранува неговата ракетна и нуклеарна програма.