„Несигурна“ победа во Луксембург

Македонија победи во Луксембург 74-82 (13-21, 21-27, 31-16, 9-18) во рамките на четвртото коло од кошаркарските квалификации за пласман на Европското првенство. По четири одиграни натпревари македонските кошаркари имаат две победи и исто толку порази.

 

Потешко од планираното Македонија успеа да слави во Луксембург кај тоталниот аутсајдер. Македонските кошаркари „одеа по жица“ откако во третиот период ја загубија предноста од 14 поени која ја стекнаа на полувремето. Луксембург третата четвртина ја доби со 31-16. Сепак одбраната во последниот период им донесе триумф од осум поени на македонските кошаркари.

 

Костоски ја предводеше Македонија со 20 поени, девет скокови и седум асистенции, а двоцифрени уште беа Тревис со 18 поени, Николовски со 15 и Јанески со 11 кошеви.

 

Македонија, во наредното коло, во Кавадарци ќе ја пречека Велика Британија, која во саботата загуби од Унгарија 80-88.