Мрчела очекува Македонија предвреме да ги исполни препораките на ГРЕКО

Сигурен сум дека македонската власт ќе направи се што е во нејзина моќ да ги исполни препораките на  Групата држави против корупција  (ГРЕКО), и извештајот за напредокот и исполнувањето на овие препораки ќе ни го испратат порано од предвидениот рок - 31 јануари 2018 година.

Ова го изјави судијата во Врховниот суд на Хрватска и претседател на ГРЕКО Марин Мрчела денеска на маргините на тркалезната маса за „Улогата на судечкиот судија во доказната постапка“ одговарајќи на новинарско прашање во врска со Акцискиот план 3-6-9 за сериозен пробив кон евроинтеграциите кој премиерот Зоран Заев го презентираше вчера.

- Очекуваме сега кога се создадени услови,  односно кога политичката состојба во Македонија е таква и Собранието и Владата можат да продолжат да работат, дека исполнувањето на препораките може да биде и порано. Како што знаеме исполнувањето на препораките не се за тоа политичарите да бидат задоволни, туку се со цел да го подобрат животот на граѓаните, нагласи Мрчела.

Премиерот Заев вчера рече дека со усвојувањето на Акцискиот план 3-6-9 Владата прави чекор за сериозен пробив кон евроатлантските интеграции по долгогодишниот застој. Задачите кои Владата планира да ги реализира во рок од три, шест и девет месеци се составен дел на предлог Планот за реформи на Владата, кој опфаќа демократизација на Парламентот, реформи во судството, јавната администрација, во изборното законодавство, услови за фер и демократски избори, кохабитација со претседателот на државата и други мерки.