МП: На Менкиноски во саботата му бил пратен законски текст со вграден дел од амандманите

На преговарачот од ВМРО-ДПМНЕ за новиот закон за јавното обвинителство, Тони Менкиноски во саботата му бил пратен законски текст со вграден дел од амандманите што не ги загрозуваат постапките и статусот на СЈО, а кои во главно се однесуваат на одредби од Етичкиот кодекс во законот, велат од Министерството за правда.

-Тоа е материјалот по кој ВМРО-ДПМНЕ треба да изгради став, имајќи предвид дека јасно нѝ е предочено кои се критериумите за отпочнување на преговорите и дека од нив отстапување не може да има, посочуваат оттаму.

Менкиноски денеска бил повикан на средба во Министерството за правда, но тој побарал одложување бидејќи сѐ уште не изградиле партиски став за одредени прашања.

Поканата за денешната средба доаѓа по изјавата на Менкиноски дека иако на последната средба со министерката за правда Рената Дескоска доставиле 65 амандмани за законот и се договориле да се видат повторно за амандманите, поминало повеќе од една недела, а од Министерството за правда не му се јавиле.