Могерини: Рано е да се говори за создавање зони за безбедност во Сирија

Мошне е рано да се зборува за создавање зони за безбедност во Сирија, изјави високиот претставник на Европската унија за надворешна политика и безбедност, Федерика Могерини, на прес-конференција во Бејрут, каде таа денеска е во посета. 

Могерини беше замолена да го коментира соопштението дека претседателот на САД, Доналд Трамп им наложил на Пентагон и на Стејт департментот да изготват во рок од 90 дена план за воспоставување зони за безбедност во Сирија. 

- Ќе ги разгледаме тие планови кога ќе се појават, изјави Могерини. 

Според неа ЕУ сака кризата во Сирија да биде решена со политички средства и во земјата да има политичка транзиција, која ќе им овозможи на сите Сиријци да се вратат во својата татковина.