Манчини под притисок од јавноста го „отстрани“ Балотели

Италијанскиот напаѓач Марио Балотели, по огромниот број на критики за неговата игра при 1:1 ремито со Полска во петокот, воопшто не е во составот на Роберто Манчини за дуелот на Италија против Португалија вечерва.

 

Името на напаѓачот на Ница не беше на списокот на 23 фудбалери кои се достапни на Манчини за дуелот на „Естадио да луж“ по големата дискусија во Италија дали Балотели воопшто беше физички подготвен за мечот со Полска. Тоа беше негов прв меч од сезоната по цело лето преговори за трансфер, кои завршија со негово останување во Ница.

 

Неговиот агент, Мино Рајола влезе во конфликт со поранешниот тренер на Милан, Ариго Саки, кој го критикуваше Балотели и посочи дека тој воопшто не треба да биде дел од италијанската репрезентација. На критиките се приклучи и поранешниот полски напаѓач Збигњев Бониек, кој изјави дека е непрофесионално таков фудбалер да биде дел од било кој состав.

 

„Негова вина е ако тој не е подготвен. Професионален фудбалер не смее да се покаже во таква форма, во која е бескорисен за сите“, изјави Бониек.