Курц: Да се затворат границите наместо спогодбата со Турција

Австрискиот министер за надворешни работи Себастијан Курц остро ја критикуваше Анкара, порачувајќи и дека не сака да се потпре на спогодбата меѓу ЕУ и Турција за бегалците, туку дека е неопходно конечно подобро да се обезбедат границите на Унијата.

 

Тој во интервју за виенскиот весник „Естерајх“ изјави дека мерките за чистка, по обидот за воен удар во Турција продолжуваат, како и заплашувањето на опозицијата, додавајќи дека сето тоа е целосно спротивно со европските вредности и оти тоа не смее да се прифати. 

 

Во врска со тоа тој повтори дека не смее да се отвораат нови поглавја во претпристапните преговори со Турција. 

 

- Според мое мислење, за Турција нема место во ЕУ, порача Курц. 

 

Тој појасни дека шефовите на држави и влади се задолжени за одлуката за прекин на преговорите, а дека шефовите на дипломатиите се задолжени за отворање нови поглавја. 

 

Курц нагласи дека отсекогаш предупредувал дека ЕУ не смее да дојде во ситуација да зависи од Турција. 

 

- ЕУ не смее да биде подложена на уцени. Спогодбата со Турција секогаш сум ја гледал како план Б, а планот А мора да биде ефикасна заштита на надворешните граници, додаде тој.