Колку вреди вашиот стан, куќа? Катастарот ќе води евиденција на проценките на имотот

Иста куќа еден проценител ја проценил на 80, друг на 60 илјади евра. Агенцијата за катастар на недвижности започна проект чија цел е да се дојде до реалната вредност на недвижностите.

Со комората на проценители склучи меморандум за соработка со кој проценките кои се прават по сите основи, не само за купопродажба, туку и за хипотеки, проценки на друштва и слично, ќе се депонираат во катастарот и ќе можат да се користат за натамошни процени.

– Правиме една голема транспарентност и на тој тип на податоци со цел истите да бидат достапни како за професионалната јавноста, така и за граѓаните. Со цел проценките да бидат реални. Да не се случи да дојдат двајца проценители за една иста недвижност и да имаат проценки со големи разлики, вели Славе Трпевски, директор на Агенцијата за катастар.

До овој момент 50 проценители имаат потпишано договор со агенцијата за катастар на недвижности и веќе ги користат податоците. Проценките кои ќе ги депонираат во катастарот ќе помогнат за првата масовна проценка на недвижностите во земјав која треба да се направи за две години. Со неа секоја недвижснот ќе добие пазарна цена, која и редовно ќе се менува, зависно од пазарот.

– Целта е да имаме транспарентен пазар и реални цени на недвижностите. Бидејќи денес кога се случуваат трансакциите, кога ќе се спореди цената напишана во договорот за купопродажба и онаа цена која е оданочена од општините, гледаме дека се појавуваат разлики во цената што ја навеле двете договорни страни и оданочената вредност. Една од целите на масовната проценка е таа, да прикажуваат реално пазарните цени кои постојат на пазарот, вели Трпевски.

Во моментов професионалните корисници, но и граѓаните можат да видат по која цена се продаваат поединечните недвижности во земјава преку регистарот на цени кој работи од март.

Економски.мк