Книга со интервјуа „Армија на мирот“ по повод 25 години АРМ

Во чест на 25-годишнината од формирањето на Армијата на Република Македонија, деновиве беше објавена „Армија на мирот“ - заедничка книга на новинарот и публицист Свето Стаменов и проф. д-р Трајан Гоцевски, универзитетски професор и министер за одбрана во првата влада на независна Република Македонија. 

Книгата содржи девет интервјуа емитувани на програмите на Македонското радио – Радио Скопје во изминатите неколку години, посветени на формирањето и на развојот на македонската армија.

- Таа е и еден вид своевидна исповед и сведоштво на еден од најодговорните луѓе на македонската одбрана во периодот на осамостојувањето на Република Македонија и создавањето на самостојниот македонски одбранбен систем и на неговата оружена компонента – Армијата на Република Македонија, чие формирање беше неопходен услов Република Македонија да профункционира како самостојна и независна држава. Токму тоа на книгата и дава уште поголема тежина, до толку повеќе што една продлабочена анализа на содржината на интервјуата покажува дека станува збор за своевидна хронолошка анализа на настаните, поткрепена со научна аргументација и документирана со оригинални сознанија за дел од настаните во кои еден од авторите бил учесник, а во најголем дел и креатор на процесите, изјави авторот Стаменов.

По „Македонски безбедносни лавиринти“, која беше објавена во 2015 година, „Армија на мирот“ е втора заедничка книга на Свето Стаменов и Трајан Гоцевски.