Ќамил Дураковиќ побара повторно пребројување на гласовите во Сребреница

Досегашниот градоначалник на Сребреница, Ќамил Дураковиќ, до Централната изборна комисија во Босна и Херцеговина поднесе барање за повторно пребројување на гласовите во општината, пренесе Танјуг.

Дураковиќ, кој загуби на локалните избори во Сребреница, побара повторно пребројување (рикаунтинг) на гласовите во сите избирачки места во Сребреница, како и на гласовите пристигнати по пошта.

Денеска завршува рокот за поднесување жалби и барања за повторно пребројување на гласовите за локалните избори од 2 октомври.

Претходно неделава Изборната комисија и официјално ја потврди победата на босанскиот Србин, Младен Груичиќ, на изборите за градоначалник на Сребреница.

Според официјалните резултати, Младен Груичиќ освоил 54,4 проценти од гласовите на изборите, а досегашен градоначалник Ќамил Дураковиќ - 45,5 проценти.

Лидерот на најголемата партија на босанските муслимани, Партијата за демократска акција, Бакир Изетбеговиќ, претходно изјави дека ќе побара повторување на локалните  избори во Сребреница заради необјаснетото мешање на полицијата на Република Српска при броењето на гласовите, и во Столац, каде гласањето беше прекинато заради насилство.

Дукаковиќ пред неколку дена на прес конференција изјави дека ЦИК не признала 2.000 гласачки ливчиња и смета дека на тој начин било одземено правото на избирачите да донесат одлука.

Тој го обвини претседателот на Република Српска и лидер на Сојузот на независни социјалдемократи, Милорад Додик, дека е одговорен за испрќањето на полицијата во зградата на општината за време на броењето на гласовите.