Кинески генерал обвинет за корупција изврши самоубиство

Кинескиот генерал во пензија Џанг Јанг изврши самоубиство по обвинувањата дека примил поткуп.

Џанг претходно го предводеше Одделот за политички работи на Народноослободителната армија на Кина, но кон крајот на август против него беше покрената истрага, по што не можеше да докаже потекло на поголемиот дел од својот имот.

Кинеската новинска агенција Ксинхуа соопшти денеска дека Џанг се убил на 23 ноември во својот дом, каде бил принуден да претстојува поради истрагата.

Борбата против корупцијата во Кина доведе изрекување казни за 1,5 милиони кадри на Комунистичката партија од 2012 досега.