Катица Јанева на условна слобода од затворот Идризово

Катица Јанева, поранешната раководителка на Специјалното јавно обвинителство, осудена во предметот „Рекет“ на седум години затвор поради злоупотреба на службената положба и овластување, добила условен отпуст и на почетокот на неделата го напуштила КПУ „Идризово“.

Информацијата ја потврди директорот на затворот, Зоран Јовановски, кој изјави дека Јанева ќе има обврска редовно да се јавува во Основниот кривичен суд Скопје сè до целосното истекување на изречената казна.

Основниот кривичен суд Скопје ја донесе пресудата за случајот „Рекет“ на 18 јуни 2020 година, а таа стана правосилна кон крајот на јули 2021 година, откако Апелацискиот суд Скопје, по повеќе од една година, ја потврди одлуката на првостепениот суд. Апелација за ваквата одлука информираше со соопштение на 21 јули 2021 година, по што Јанева два дена подоцна беше спроведена на издржување на казната во затворот „Идризово“.