Јункер: Нема краен рок за почеток на преговорите за Брегзит

Претседателот на Европската комисија Жан-Клод Јункер изјави денеска во интервју за Франс 2 дека нема краен рок за Велика Британија да ги почне преговорите за излез од Европската унија.

Новиот британски премиер Тереза Меј му посочи на Јункер претходно овој месец дека Велика Британија се надева на позитивни преговори во ЕУ по референдумот од 23 јуни за напуштање на Унијата, но дека Лондон има потреба од време за да ги подготви преговорите. 

Претседателот на ЕК нагласи дека нема кран рок, бидејќи членот 50 од Лисабонскиот договор, со кој е уредена процедурата за напуштање на Унијата може да биде активиран единствено од Велика Британија. 

- Би сакал Обединетото Кралство да ни достави барање за оставка, доколку можам така да се изразам, што е можно поскоро, бидејќи мислев дека Британците, особено тие, кои сакаат да ја напуштат ЕУ се подготвиле за таква можност, рече Јункер.