Ѓоковиќ загуби сет и се повлече од Австралија опен

Српскиот тенисер Новак Ѓоковиќ, кој поради повреда се повлече од полуфиналето на Австралија опен откако го загуби првиот сет од Германецот Александар Зверев, најави дека за него е болно да биде на теренот.

На прес-конференцијата по натпреварот тој објави дека болката во левата нога се влошувала, а на мечот со Зверев играше со преврзана нога.

-Дури и да го освоев првиот сет, тоа ќе беше огромна и многу тешка битка за мене. Можеби ќе одиграв уште неколку гемови или сетови, не знам. Немав доволно гориво во мојот мотор, призна тој.

Запрашан дали ова му е последен настап на Австралија опен, тој одговори: „Можно е, кој знае. Да видиме како ќе помине сезоната, сакам да одам напред“.