Герасимовски: Почнуваме есенска офанзива низ сите маала во Центар

Општина Центар започнува есенска теренска офанзива во која градоначалникот Горан Герасимовски, заедно со општинските служби и одговорните лица од урбаните заедници, ќе ги посети сите маала и улици на територијата на општината - соопшти денеска општинската прес-служба.

Целта е директно на терен да се евидентираат проблемите со кои секојдневно се соочуваат граѓаните – оштетени улици и тротоари, дупки, паднати или оштетени столпчиња, проблеми со урбаната опрема и сите други недостатоци за кои Општината може веднаш да преземе мерки. 

Есенската офанзива започнува од Капиштец, а во следниот период ќе продолжи во сите останати маала и урбани заедници во Центар. 

- Почнуваме од Капиштец, но ќе ги поминеме сите маала, улици и урбани заедници. Заедно со службите, одговорните во урбаните заедници, но и со граѓаните, сакаме на лице место да ги видиме проблемите и што побрзо да реагираме. Се работи секојдневно, но секогаш има работи што треба да се поправат и подобрат. Затоа излегуваме на терен – да ги слушнеме граѓаните, да ги детектираме проблемите и да ги решаваме еден по еден - вели во пишана изјава Герасимовски. 

Од Општина Центар посочуваат дека теренските обиколки ќе продолжат во наредниот период, со цел забелешките од граѓаните побрзо да стигнат до надлежните служби и да се интервенира таму каде што е потребно.

МИА