Георгиадис: Не постои апсолутно никаков страв од ширење на хантавирусот во Грција

Не постои апсолутно никаков страв од ширење на вирусот во Грција, но Грција никогаш не остава никого сам, нагласи министерот за здравство на Грција Адонис Георгиадис за грчкиот државјанин од крузерот „Хондиус“, кој во текот на ноќта беше превентивно префрлен во атинска болница, каде што ќе биде во 45-дневен карантин, јави дописничката на МИА од Атина.

Грчкиот државјанин, првично со холандски авион беше префрлен во Ајндховен од каде што со специјален лет на авион на военото воздухопловство кусо по 3 часот утрово беше пренесен во Универзитетската општа болница „Атикон“, во специјално подготвена соба.

Георгиадис, преку Икс посочи дека не постои причина за загриженост, а задолжителниот карантин е само мерка на претпазливост.

-Тој е без температура и асимптоматски, без никакви знаци на болест. Единствено од превентивни причини е префрлен во болницата „Атикон“ во карантин. Не постои апсолутно никаква причина за загриженост, напиша министерот за здравство на Грција.

Паралелно им се заблагодари на екипажот на авионот, на придружниот персонал на службата за брза помош и на претседателот на Националната организација за јавно здравје на Грција за нивниот придонес во реализирањето на репатријацијата на грчкиот државјанин.

Според медиумите во Грција, станува збор за 70-годишен пензионер.

МИА