Финансова полиција и директорот Муареми денеска ќе поднесат кривична пријава до ООК

Финансова полиција и директорот Арафат Муареми до 13:00 часот ќе ја поднесат кривичната пријава до Обвинителството за организиран криминал. 

Според извори на Сител, пријавата ќе биде поднесена против шефицата на обвинителството, Вилма Русковска и сите обвинители кои учествувале во претресот во Финансова полиција. 

Инаку, пријавата како што велат нашите извори следува откако надзорот ги потврдил сомнежите на Муареми дека претресот бил спроведен со низа неправилности. По меѓусебните обвинувања на првиот човек на финансова и шефицата на обвинителството за организиран криминал Русковска бараше да се проверат фактите од меѓународните институции и амбасади од каде порачаа дека ова треба да се реши меѓу надлежните органи. 

Истражители од Обвинителството пред три недели влегоа во финансова по пријава на група граѓани под сомнение за сторено кривично дело „примање награда за противзаконито влијание“. За време на претресот се чешлаа сите предмети кои биле работени од 2018 година до сега а се однесуваа на финансиски криминал.