Евакуација во Дортмунд поради неексплодирани бомби

Во германскиот град Дортмунд се спроведува евакуација на населението, откако се пронајдени неексплодирани бомби од Втората светска војна.

Градските власти утрово започнаа да ги преместуваат луѓето од густо населениот дел во градот. Околу 14.000 жители се повикани да ги напуштат домовите во рамки на операцијата. Организирано е времено засолнување во едно училиште. Затворен е и главниот влез на централната железничка станица, соопшти на Твитер германскиот железнички оператор Дојче бан.

Потврдено е дека две од четирите откриени бомби се неексплодирани и се од Втората светска војна. Властите планираат да ги деактивират подоцна во текот на денот. Експлозивните направи се наоѓаат во близина на две болници, што ги принуди локалните власти да започнат со префрлање на пациентите во други здравствени установи.