Египетски милијардер води преговори за купување два грчки острови на кои ќе насели бегалци од Сирија

Египетскиот милијардер Нагиб Сауирис вчера соопшти дека води преговори за купување на два грчки острови, на кои ќе насели илјадници бегалци од Сирија и од други конфликтни зони.

На почетокот на септември богатиот египетски бизнисмен предложи на Грција и Италија да купи од нив острови, на кои ќе бидат прифатени мигранти. - Ќе им создадам работни места, така што ќе се вклучат во економијата на нивната нова држава, објави Сауирис на „Твитер“.

Од почетокот на годината над 430.000 лица, главно од Сирија, го минаа Средоземно Море, бегајќи од сиромаштија или од конфликтите во своите земји со надеж да стигнат до Европа, покажуваат податоците на Меѓународната организација за миграција.

- Разгледувам два острови во Грција и сега водам преговори со нивните сопственици. Подготвени сме да преговараме со нив, под услов грчката Влада да даде согласност таму да бидат прифатени што е можно повеќе бегалци. Очекуваме зелено светло од Грција, за да почнеме со неопходните административни постапки за прифаќање на бегалците, нагласи Сауирис.

Сауирис ќе се сретне со претставници на Високиот комесаријат за бегалци на ОН, со цел да разговараат за можни форми на соработка.