ДИК ги објави кандидатските листи за предвремените избори

Државната изборна комисија (ДИК) денеска на својата веб - страна ги објави листите на кандидати за пратеници во Собранието на Република Македонија.

На изборите на 11 декември ќе учествуваат 11 политички субјекти: шест политички партии и пет коалиции со 58 листи на кандидати. 

Коалицијата предводена од ВМРО-ДПМНЕ, ДУИ, коалицијата предводена од СДСМ, Коалицијата за промени и правда - Трет блок и Коалиција ВМРО за Македонија поднесоа кандидатски листи за сите шест изборни единици и за дијаспората. ДПА поднесе кандидатски листа во Првата, Втората, Третата, Петата и Шестата изборна единица. ПДП поднесе кандидатска листа само во Изборната единица 6. Либералната партија поднесе кандидатска листа во Првата, Втората, Третата, Четвртата и Петата изборна единица. Левица поднесе кандидатски листи во Првата, Втората, Третата, Четвртата и Петата изборна единица. Движење Беса пондесе кандидатски листи во Првата, Втората, Петата и Шестата изборна единица. Коалиција „Алијанса за Албанците“ поднесе листи во Првата, Втората, Петата и Шестата изборна единица. 

Во Избирачкиот список за предвремените парламентарни избори се запишани вкупно 1.784.524 лица со право на глас.

Кандидатските листи може да се најдат на следниот линк :http://www.sec.mk/listi-za-predlaganje-na-kandidati-za-izbor-na-pratenici-vo-sobranieto-na-republika-makedonija/​.