Демирташ со повик до ПКК и турската Влада за прекин на насилствата

Лидерот на прокурдската партија во Турција, Селахатин Демирташ ги повика денеска ПКК да го „тргнат прстот од чкрапалото“, а Владата да запре со бранот насилства и отпочнување дијалог.

Демирташ лидер на Народната демократска партија се обрати откако шест луѓе загинаа во судири на силите за безбедност и бунтовници на југоисток во државата, претежно населен со Курди.

- Денеска ги повикувам двете страни - ПКК мора веднаш да го тргне прстот од чкрапалото и да објави дека ќе почитува прекин на огнот, нагласи тој на прес конференција во Ван.

Демирташ додаде дека Владата мора да ги запре безбедносните акции и да соопшти дека е подготвена за дијалог.

Насилствата се случуваат во момент на политичка нестабилност во Турција каде коалиција треба да биде формирана, што ги зголемува можностите за предвремени избори. 

ПКК во средината на јули соопшти дека ќе ги засили нападите оти турските сили го кршат примирјето. Насилствата ескалираа кога Турција бомбардираше кампови на ПКК на север во Ирак на 24 јули.