Автомобилски протест на улиците на главниот град на Шри Ланка

Колона од стотици автомобили на поддржувачи на соборениот премиер на Шри Ланка Ранил Викремесинге помина низ улиците на главниот град Коломбо со барање да се свика Парламентот за да ја реши политичката криза во највисоките ешалони на власта.

На 26 октомври претседателот Маитрипала Сирисена ненадејно го разреши премиерот Ранил Викремесинге и го замени со поранешниот лидер Махинда Раџапакса, кој управуваше со земјата од 2005 до 2015 година.

Во моментов во Шри Ланка има двајца сопернички премиери. Викремесинге одбива да ја предаде власта затоа што смета дека неговото разрешување е противуставно.

Колоната од автомобили, авторикши и камиони со поддржувачи на премиерот помина низ улиците на главниот град и заврши на централниот плоштад. Возачите носеа портрети на Викремесинге и транспаренти „Власт на народот“.